Entrega de sinaturas no concello: 1889!

O día de onte, sábado 18 de abril, ás 10:30, fixemos a entrega das 1889 sinaturas de apoio recollidas no rexistro do Concello de Oleiros. Tras unha primeira experiencia nas festas de Santa Cruz o 13 de decembro, dende o 21 de decembro @s integrantes da plataforma comezamos a nos situar nas proximidades da parcela do Maxi os domingos de 12:30 a 14:00 para informar aos veciños e visitantes da localidade do proxecto de construción do apartahotel, das súas dimensións e impacto, e para solicitar que asinasen o noso manifesto reclamando a adquisición da parcela polo concello.

Con esa adquisición posibilitaríase o seu uso público e evitaríase a formación dunha barreira de 18,5 metros de alto e case todo o ancho da finca, moito meirande que o vello edificio do Maxi, que separaría a nosa vila do mar e nos privaría a todos, residentes e visitantes, das mellores vistas da comarca. Os primeiros días a meirande parte dos paseantes pola zona, tanto veciños como visitantes, amosáronse sorprendidos ao escoitar que se pretendía construír un edificio desas dimensións e que só ficaba pendente a licenza de obra. Crían que fose o que fose o que se ía facer, era un proxecto a longo prazo e non sabían que era inminente, e mesmo había bastante xente que sendo de Santa Cruz e arredores custáballe crer que o Concello, e en particular o alcalde, fose consentir un atentado urbanístico coma ese, que deixaría a Santa Cruz tolleita durante décadas.

En tres ocasións tamén fixemos recollida de sinaturas en Santa Cristina - Perillo, á mesma hora, e o apoio tamén foi moi importante, inda que obviamente, ao non estar no lugar en que se pretende atentar contra a paisaxe, podía resultar menos inmediato visualizar o problema.

Outra vía para recadar apoios foi a nosa solicitude de change.org, que podía ser difundida por Internet. Sendo importante, insistimos máis na recollida en persoa, en papel, porque tamén permitía escoitar as opinións da xente, as súas suxerencias e aportacións, e respostar a dúbidas que podíamos ter pasado por alto.

Ao transcorrer as semanas, comezamos a notar que había xente que nos transmitía que se achegara á parcela a propósito para asinar. A problemática comezara a se facer pública, tanto polo boca-orella como polas aparicións en distintos medios de comunicación.

Ao tempo, tamén comezaba a resultar evidente que a maioría dos veciños e habituais da zona xa asinaran o manifesto, e pasaron a ter máis peso os turistas e visitantes ocasionais, procedentes de calquera lugar do mundo, dende Xapón a Estados Unidos, de Alemaña a Brasil, Senegal ou Italia. E mesmo da Coruña! Moitas persoas procedían de lugares como o norte de Italia, Suíza, Dinamarca ou Bretaña, onde existe unha longa tradición de defensa e posta en valor do patrimonio monumental, paisaxístico e urbanístico, e transmitíronnos a súa case incredulidade ao saber do atentado que se pretende levar a cabo en Santa Cruz, e que neses territorios non sería tolerado.

A valoración que facemos do proceso de recollida e información directa é moi positiva, non só polas sinaturas e o que representan senón polo apoio que a xente nos transmitiu, chegando moit@s a nos agradecer a tarefa que estamos a realizar.

Presentación da taxación oficial da finca, denegación de permiso do concello para un acto en exteriores e última recollida de sinaturas

Este Venres día 10, ás 10:30 da mañá, presentouse nunha rolda de prensa a taxación da finca do Maxi realizada polo Gabinete Técnico Pericial Ibérica, un informe de valoración realizado por un perito xudicial inmobiliario, válida a calquera efecto. O importe calculado para o solar é de 980.341 euros.

 
As páxinas en que se detalla son as que acompañan ao texto. Pódese pulsar para ampliar.

Declaración  

A demolición do edificio do hotel Maxi supón unha oportunidade histórica para que o Concello de Oleiros recupere para uso público un espazo excepcional, pegado á costa e que libre de edificacións permite que dende grande parte de Santa Cruz se desfrute dunhas das mellores vistas da comarca, divisándose o castelo, a ría e a cidade da Coruña.
 

O Castelo de Santa Cruz, un ben declarado de interese cultural e adquirido polo concello, é unha das imaxes máis representativas de Oleiros. Xunto co propio litoral, o Parque Luís Seoane e o porto de Santa Cruz forman un conxunto paisaxístico de grande valor e atractivo turístico. A desaparición do edificio do hotel Maxi eliminou a principal barreira visual entre o centro de Santa Cruz e a costa, permitindo recuperar unha relación entre o pobo e a paisaxe que cambia completamente a percepción dos veciños e de calquera visitante.

O aumento do atractivo do pobo de Santar Cruz é absolutamente innegábel, dificilmente se podería ter realizado un cambio a mellor tan evidente. Mesmo permanecendo en pé por agora o muro da finca e coa parcela asfaltada, as vistas ao mar, ao castelo e á costa convidan a quen está de paso a parar e supoñen a mellor tarxeta de presentación posíbel. O impacto sobre o turismo e a hostelaría dun cambio coma este é difícil de cuantificar a priori, pero é evidente que a mellor.

 Vídeo da presentación

O estudo de detalle aprobado aumenta a altura, permitindo 15m de altura da fachada e 3,5m en baixo cuberta, co cal estariamos perante unha barreira de 18,5m de alto. Tamén autoriza unha anchura en paralelo á costa de case o 100% da parcela. Isto suporía unha separación entre o pobo e o mar moito meirande que a que xa existía co anterior edificio. Sería un xeito de privatizar unha paisaxe, que quedaría para quen pagase a estancia mentres se lle negaría á veciñanza.
 

Consideramos que o noso deber é defender ese patrimonio e reivindicamos o noso dereito a participar no deseño urbanístico da nosa vila e do noso concello. Partindo desa base, reclamamos ao concello de Oleiros que abra negociacións co propietario da parcela para a adquisición desta. A permuta por fincas propiedade do Concello e a compensación con aproveitamentos urbanísticos noutras actuacións non é algo insólito senón un sistema utilizado repetidamente polo Goberno Municipal para adquisición de fincas (Finca tenreiro, indemnización na urbanización de Carballido...). O Concello vai ter aproveitamentos urbanísticos no SUD-11 (campo de golf de Xaz) que pode permutar.
 

A taxación que presentamos evidencia que a adquisición deste terreo é perfectamente posíbel: o importe en que se valora a parcela é de 980.341,00 euros. É unha cifra considerábel, pero mesmo se non se aceptase a permuta, sería asumíbel por un concello que no número 45 da publicación “Vivir en Oleiros” declara que o ano pasado tivo un superávit de 3,5 millóns de euros.

O goberno municipal ten a obriga de defender os dereitos e intereses dos veciños, e consideramos que ten recursos máis que suficientes para, seguindo os procedementos estabelecidos e axustándose á lei, impedir unha agresión deste calibre ao noso patrimonio, á nosa calidade de vida e mesmo ao futuro da nosa vila, cuxo deseño urbanístico, imaxe e integración co medio durante moitas décadas dependerá das actuacións que se realicen agora.


Denegación do permiso para un acto público

Dende o concello, despois de que se nos dixese verbalmente que non habería inconvinte, prohíbesenos facer un acto, concretamente unha foliada reivindicativa que ademais de música incluiría xogos tradicionais, na praza de Esther Pita, próxima á parcela. Como alternativa só presentan a posibilidade de facelo no parque das Torres de Santa Cruz, que está separado do centro da vila e rodeado por un muro. A excusa que dan dende o concello é que a praza, na que se celebran as festas de Santa Cruz, está concorrida e hai nenos. 
 

Resulta evidente que só se pretende impedir que se realice unha xornada reivindicativa nun lugar público con visibilidade, pretendendo que se se realiza sexa nun sitio agachado á vista dos transeúntes, no que consideramos un xesto autoritario e impropio dunha corporación democrática. Como resposta pasamos a presentar a seguinte solicitude á subdelegación do goberno:

 

Última recollida de sinaturas
 

O domingo 12, de 12:30 a 14:00 fixemos a que en principio foi a última recollida de sinaturas antes da entrega ao concello. Fixemos dous grupos, un en Santa Cruz e outro en Santa Cristina e os resultados e o apoio recibido foron moi importantes.

Actuacións dende o concello, novas informacións e actividade da plataforma

Actuacións do concello e informacións en prensa

Dende o último texto os acontecementos fóronse sucedendo de xeito un tanto caótico, así que imos tentar seguir a cronoloxía dende onde a deixamos nese post.

- O 8 de xaneiro (saíu en prensa o día 9), o alcalde de Oleiros, Ángel García Seoane, afirmou en Radio Oleiros que cando delegou competencias para negociar a adquisición da parcela do Maxi no concelleiro do BNG Manuel Sarmiento, en realidade quería que fracasase. Non respostou ás criticas do concelleiro por terlle negado a documentación necesaria para realizar a adquisición seguindo os trámites legais. O alcalde mencionou, sen ter ningunha taxación e dando a impresión de que o estaba a inventar, que o prezo era disparatado. De feito, se a cantidade que indicou fose correcta, superaría o 10% do presuposto anual e tería cometido un presumíbel delito de prevaricación, porque tería delegado como alcalde unha competencia propia do pleno do concello. Tamén defendeu que o edificio, de ate 18,5m de alto e de ancho do total da parcela, non quitaría vistas, e insistiu en que un hotel de 5 estrelas sería moi beneficiosa para o pobo. Segundo esas declaracións, o edificio debería ser completamente transparente, e a intimidade dos hóspedes do hotel veríase un pouco comprometida.

- O alcalde seguiu a defender a importancia e transparencia do hotel de 5 estrelas tanto en Radio Oleiros coma nos distintos programas de emisoras privadas (Ser, COPE) ás que o Concello de Oleiros, como institución pública, paga con diñeiro de todos os cidadáns para que o noso alcalde teña unha sección dende a cal defender ou publicitar as súas actuacións. Supostamente xustifícase como promoción do concello. 

- O 25 de xaneiro publicouse neste enlace e posteriormente neste outro que o proxecto da empresa propietaria da parcela, Hostcastros S.L., é construír un apartahotel con 14 apartamentos e 6 cuartos dobres, pensado para tempadas de ate varios meses. Non sería un 5 estrelas, e nin tan sequera sería un hotel. O posíbel emprego que xera un edificio así é case nulo: só se precisa subcontratar a limpeza para cando uns visitantes deixen libre o seu apartamento. Para iso é para o que se deixaría sen vistas á ría e ao castelo á meirande parte de Santa Cruz, agachando o meirande atractivo turístico do pobo e privando aos veciños dunha das mellores vistas da comarca.

- O 29 de xaneiro celebrouse un pleno do concello en que o grupo de goberno negouse a tramitar unha proposta do BNG para instar a comezar unhas negociacións serias para a adquisición do terreo, e o alcalde pechou o pleno con este sentido discurso:

Dende a plataforma veciñal "Santa Cruz aberta ao mar" consideramos este discurso, xunto con outros semellantes emitidos na radio, absolutamente escandaloso. O alcalde ostenta un cargo nunha institución democrática en representación dos veciños de Oleiros, e debe defender os dereitos e intereses dos cidadáns. Nesta cuestión está a se comportar como se fose o avogado dunha empresa privada, defendendo ate perder a compostura aos propietarios e desbotando por completo actuar para protexer o noso patrimonio cultural e paisaxístico e a nosa calidade de vida.

- Entre o 28 de xaneiro e o 1 de febreiro, La Voz de Galicia realizou unha enquisa online que permitía votar a favor ou en contra do proxecto, os resultados, que se poden ver aquí  son moi claros: un 84,25% dos votos son en contra da construción dun "hotel" nese terreo.
  

Actividade da plataforma

Nestas últimas 5-6 semanas a plataforma realizou cada domingo ás 12:30 unha recollida de sinaturas no centro de Santa Cruz, nas inmediacións da parcela do Maxi. A nosa valoración xeral é moi positiva: a grande maioría das persoas contactadas está a asinar o noso formulario de apoios. Unha parte moi importante transmítennos o seu estupor polo proxecto do apartahotel, que consideran unha aberración urbanística, e moitos solicitan información sobre a actividade do grupo.

Recollida de sinaturas do domingo 11 de xaneiro

Recollida o domingo 18 de xaneiro

Tamén realizamos unha rolda de contactos con simpatizantes, que levou a que varias persoas máis pasasen a colaborar na plataforma. Agora mesmo estamos a contactar e a nos entrevistar con distintas asociacións ecoloxistas, de defensa do patrimonio e doutros tipos para solicitar asesoramento e apoio. Nesa liña, tamén estamos a nos comunicar e a acordar reunións con representantes de distintos organismos públicos. Este último mes, en resposta á confirmación de que os plans da empresa Hostcastros consisten na construción dun apartahotel, o PP sumouse ao BNG en reclamar a adquisición da parcela para convertela nun espazo público. O PSOE tamén indicou que de non se construír un hotel de 5 estrelas non atopa xustificado ocupar ese terreo. Dos partidos políticos con representación no Concello de Oleiros só o gobernante, Alternativa dos Veciños, semella manter o seu apoio á construción do edificio.

En paralelo a estas actividades, estivemos a recadar información aportada de xeito desinteresado por distintos profesionais: avogados, arquitectos, expertos en patrimonio e outros. En base a esta e ás nosas propias reflexións e debates, estivemos a acordar cales serán os próximos pasos a realizar, dos que iremos informando cando se concreten en formato, data e hora.

Prohibición de aparcar na parcela e movementos do concello

Feliz fin de ano a todos! Como nesta última semana e media déronse varios acontecementos relacionados co obxectivo da plataforma, aí vai un breve resumo dos feitos.

Resumiremos o acontecido nas últimas semanas dende a filosofía que adoptamos ao nos constituír: centrarnos no noso obxectivo, que é a adquisición para uso público da parcela do antigo hotel Maxi, para permitir que Santa Cruz de Liáns (Oleiros) manteña e amplíe ás espectaculares vistas ao Castelo, á ría á cidade da Coruña, mellorando a calidade de vida dos veciños, aumentando o atractivo turístico do pobo e do concello de Oleiros e axudando conservar e facer accesíbel un patrimonio cultural e paisaxístico que non só nos pertence a nós senón tamén ás próximas xeracións. Para iso apelamos ao dereito da cidadanía a decidir sobre o deseño urbanístico da vila en que desenrolan as súas vidas.


O día 23 de decembro unha rapaza pertencente a plataforma viu estes cartaces na entrada da parcela do Maxi:

E ao día seguinte apareceron estas pedras, impedindo o paso dos coches:

Fronte á decisión do propietario da parcela de prohibir aparcar, temos que dicir que dende a plataforma mencionamos que non se podía cobrar a taxa da ORA por aparcar nun recinto privado, e máis nada. A prohibición de aparcar é unha decisión particular do dono.


Actuacións do concello

A maiores, foron saíndo distintas informacións de prensa nas que se indicaba a apertura de xestións para a adquisición da parcela e como se ía desenrolando o proceso. As novas relacionadas co obxectivo da plataforma agrúpanse na sección "Nos medios", na parte superior dereita. Os feitos sucedéronse así:

- O alcalde, Ángel García Seoane, delegou en Manuel Sarmiento, concelleiro do BNG, a competencia para negociar a adquisición do solar do Maxi, mediante decreto. Este enterouse a través da prensa o domingo 14 de decembro. Na seguinte semana, luns ou martes, recibiu a comunicación. Referencias de prensa aquí e acolá.

- O martes 16 á mañá o concelleiro aceptou a delegación e procedeu a solicitar a documentación prevista para calquera proceso de adquisición dun ben inmoble por unha administración pública. Esta documentación débea elaborar o persoal do concello e inclúe unha taxación na que se lle asigne un valor á finca, a declaración do ben como de interese público e un informe sobre o procedemento administrativo axeitado para a adquisición. Na prensa: ver isto, iso e aquilo.

- O luns 29 de decembro o concelleiro Manuel Sarmiento recibiu unha carta da alcaldía en que se lle urxía a comezar negociacións co propietario da parcela, pero negándolle a documentación para facelo legalmente e indicáballe que simplemente falase co propietario. Na prensa apareceu esta, esa e aquela información.

A carta do alcalde é esta:

Dende a plataforma só pretendemos difundir cal é a situación de cara á adquisición da parcela e solicitar que o proceso de adquisición sexa honesto e cumpra todos os requerimentos legais. O concello ten realizado numerosas adquisicións de terreos, de xeito negociado ou mediante expropiacións, para protexer a costa de construcións que degradasen o medio e a paisaxe, e non pensamos que haxa ningunha razón para que este caso, que afecta ao monumento máis coñecido de Oleiros, o castelo de Santa Cruz, e á súa contorna, teña que ser tratado de xeito diferente. 

Reclamamos que, seguindo os procedementos legais e habituais, se faga a taxación do terreo, a declaración de interese público e o informe sobre o procedemento administrativo a seguir. Non son un "sinfín de informes", só tres. O "informe" que inclúe a carta non di que só se poida adquirir por acordo, e o alcalde ten a obriga de defender os dereitos dos veciños, sen someter estes aos intereses dun particular.

Rolda de prensa de presentación da plataforma

Finalmente o venres 19 de decembro ás 4 da tarde, e no propio solar do Maxi, a plataforma Santa Cruz aberta ao mar presentouse oficialmente aos medios nunha rolda de prensa. 

Asistiron xornalistas de La Voz de Galicia e de La Opinión de A Coruña, que xa publicaron as informacións correspondentes aquí e acolá.

Para os interesados que non puidestes vir, que sodes a maioría, poñemos o vídeo. Isto permítenos presumir da paisaxe que tentamos preservar, do ben que comunica a nosa voceira Isa e do civismo e saber estar dos membros da plataforma, bebés incluídos.

 

Presentación Santa Cruz aberta ao mar

Proposta de cartaces para a rolda de prensa

Ola a todos! Co tempo de que dispoñemos e ao non ter moito onde elexir para as fotos de partida, coido que será mellor limitarse aos típicos cartaces de antes e despóis. 

O apantallamento da paisaxe é moi obvio, e ata pode ser máis digno, porque se só facemos unha proxeción aproximada ou cun polígono debuxado que dé impresión de forzado, daría mala imaxe.

Irían en dous cartaces de A2, e pódense descargar directamente facendo click co bótón dereito e indicando salvar imaxe:

 Esta é a versión con edificio

E esta é sen edificio. Síntoo, pero o ceo non estaba moi despexado que digamos

Documento e planos do estudo de detalle aprobado. Nova pegada

Para quen queira consultar a documentación orixinal do estudo de detalle aprobado polo concello, poñémola á vosa disposición nos seguintes enlaces:

Texto refundido do estudo de detalle
 
Planos da edificación


A maiores, para informar á veciñanza da constitución da plataforma e publicitar os seus obxectivos realizaremos proximamente unha pegada con algún dos seguintes cartaces:

Cartaz próxima pegada

  

Sí, son semellantes, pero é moi tarde e mañá será outro día.

Finalmente o gañador non é ningún dos anteriores, senón este:

 Que a todo isto tampouco é que sexa moi diferente ... . Vai ir en branco e negro, así que a ver que resultado dá ao imprimir.