Vista do Maxi

Vista do Maxi

xoves, 12 de novembro de 2015

Asemblea na praza Esther Pita

Como xa anunciáramos na anterior entrada, o 11 de outrubro ás 20:30 reunímonos na praza de Esther Pita para acordar unha posición común sobre os plans do alcalde, Ángel García Seoane, e os propietarios da parcela do Maxi, partindo da información que foron transmitindo e que combina opacidade con contradicións flagrantes,  e para decidir as actuacións a realizar coma asociación.


A nosa visión da situación actual non deixa de ser a que se descreve neste outro artigo, e que podemos resumir en que a demanda da empresa pola denegación da licenza de edificación antes das elecións municipais non existiu: o concello, de acordo co propietario, denegou o permiso coa excusa de que só admitía un hotel, para paliar os danos electorais que lle ocasionaría defender unha barreira de cemento que deixaría a Santa Cruz sen mar e apantallaría o castelo. 

Pasadas as elecións, pretenden edificar aducindo que sí vai ser un hotel, inda que por declaracións da empresa, semella que coma mínimo non está moi claro que vaia ser un hotel normal. Sempre dixemos que un hotel non semellaba unha opción viábel porque a demanda actual está máis que cuberta, e todo indica que será máis ben un edificio de apartamentos de aluguer.

En canto ás accións a realizar, acordamos comezar a preparar unha mobilización que permita visualizar a oposición da veciñanza a este proxecto e a esixencia de que o Concello actúe para preservar o noso medio, paisaxe e calidade de vida. Por suposto, seguimos a insistir en que iso pódese levar a cabo de xeito negociado cos propietarios da parcela, oferecendo alternativas de ubicación para ese mesmo negocio ou outro tipo de compensacións. Tendo en conta o valor de moitos terreos en mans da administración local, non vemos nengún motivo que impida chegar a un acordo que, sen perxudicar a ninguén manteña Santa Cruz de Liáns aberta ao mar.

xoves, 5 de novembro de 2015

Reunión con colectivos e convocatoria de asemblea pública

Este mércores ás 20:30 tivemos unha reunión con distintos colectivos cos que xa contactáramos anteriormente, para coñecer a súa posición con respecto ao obxectivo da asociación, recadar apoios e ter outros puntos de vista nun intre en que os acontecementos obrígannos a tomar decisións con rapidez. O encontro contou con representantes de BNG, EU, PSOE, PP, CxG, Podemos, Partido da Terra, Piratas de Galicia e ADEGA.

Confirmamos e reafirmamos unha idea previa: a necesidade de comezar inmediatamente coas mobilizacións. Para estabelecer o formato e calendario procedemos a convocar unha asemblea aberta na que debatiremos as propostas que se presenten e decidiremos as accións a realizar. 



A maiores tamén acordamos proceder a contactar co principal propietario da parcela, coa intención de saber que tipo de compensación lle resultaría satisfactoria. Así e todo, consideramos que é a cámara municipal a responsábel de aportar unha solución, preferentemente mediante un acordo cos promotores para permitir que sigan adiante con ese proxecto ou outro semellante nunha ubicación alternativa.

O governo municipal actuou ate agora de xeito absolutamente parcial, defendendo intereses particulares sobre os do conxunto da poboación. Alén diso, o Alcalde refuga dar explicacións sobre a situación, de xeito que a escasa información que circula é contraditória e confusa.

 


sábado, 24 de outubro de 2015

Licenza opaca nun proceso cheo de sombras

No último número da publicación "Vivir en Oleiros", e que se recibiu onte, venres 24, nalgúns domicilio, afírmase de xeito ambiguo que a licenza de edificación na parcela do Maxi xa foi concedida e que se agarda que as obras comecen antes de fin de ano.

Nesta publicación editada polo concello e que é básicamente un instrumento de propaganda do grupo de goberno -consideramos que quen diga outra cousa non pode ser obxectivo-, na páxina 15 do seu número 49 aparece a seguinte "noticia":


Como se pode ver, no título afírmase que a licenza "será outorgada" e no minúsculo texto que a acompaña, de só 5 liñas, dise que "o Concello de Oleiros concedeu a licenza". Acompáñase dunha simulación idealizada do resultado, segundo a cal o presunto hotel sería transparente, co cal poderíase ver dende a rúa o interior das habitacións, o que non semella moi críbel.
 
Non se menciona a existencia dunha plataforma en contra de que que este edificio, de 18,5m de alto e todo o ancho da finca, e que suporá unha pantalla visual moito peor que o antigo Maxi, convirta Santa Cruz de Liáns nunha vila case sen mar, ou con este agachado, tapando tamén para case toda a poboación o castelo de Santa Cruz, símbolo de todo o Concello de Oleiros. Non se dí nada das 1.898 sinaturas entregadas en contra dun atentado urbanístico, paisaxístico e medioambiental, e que o alcalde Ángel García Seoane, dun partido na práctica absolutamente persoalista que se fai chamar Alternativa dos Veciños, ignorou totalmente, sen tan sequera se reunir cos membros da plataforma que presentou eses apoios. Non se indica que apantalla un ben de interese cultural como é o castelo. 

A empresa Hostcastros SL, creada só para esa fin e participada por dous grandes empresarios do sector do xogo (máquinas comecartos, casinos e semellantes) non pretendía facer un hotel senón un edificio de apartamentos. Tendo en conta que a ocupación dos estabelecementos xa existentes en Santa Cruz é moi discreta e que os socios de Hostcastros semellan ser conscientes, é moi probábel que en pouco tempo se reconvirta en edificio de apartamentos ou semellante. Tampouco se nos indica que o noso estimado alcalde foi de convidado á voda dun fillo dun dos socios da empresa.

Os insultos adicados por Ángel García Seoane aos veciños de Oleiros que solicitamos que o Concello adquira, de xeito negociado e dando alternativas, a finca do Maxi, foron parte dun proceso en que o alcalde fixo unha cesión de competencias en falso a un concelleiro da oposición, o representante do BNG Manuel Sarmiento; o que pensamos que foi unha denegación de licenza táctica xusto antes do comezo da campaña electoral das municipais, conseguindo enganar cando menos a parte da opinión pública de Oleiros; e por agora remata cunha suposta concesión de licenza sen informar á prensa nin ao pleno do concello, indicándoo a posteriori dende un órgano de propaganda.

En todo este tempo empregamos unha linguaxe sen agresividade e solicitamos unha solución sen damnificados, pero esta última acción, que semella pensada para comezar as obras antes de que se poida producir nengún debate ao respecto -cousa que non vai acadar-, é a constatación de que o goberno actual do concello compórtase como os que no seu día tiveron Marbella ou Barreiros en canto a transparencia e respeito aos  electores.

Obviamente imos dar resposta o antes posíbel, e coma veciños de Santa Cruz e coñecedores do que acontece, non podemos deixar de nos perguntar polas motivacións que poden empurrar a Ángel García Seoane a defender con todos os medios ao seu dispor os intereses de dous multimillonarios mentres nega un emprazamento alternativo ou unha idemnización digna aos copropietarios -a maioría deles traballadores para quen é o seu medio de vida- da gasoliñeira de Santa Cruz. Semella que a menos que haxa outras motivacións máis escuras, para o señor Ángel García Seoane, que de palabra presume de anticapitalista e mesmo comunista, inda hai clases e unhas merecen un mellor trato que outras.


 

luns, 31 de agosto de 2015

Inscrición oficial da "Asociación Santa Cruz Aberta ao Mar"



O día 18 de agosto presentamos a acta fundacional, os estatutos e demáis documentación para nos inscribir como asociación no rexistro da Xunta. Os motivos que nos levaron a optar pola inscrición formal son variados: a posibilidade de nos persoar en causas xudiciais ou de solicitar espazos públicos para actos informativos e ou reivindicativos como tal asociación; adaptar o funcionamento interno a unha posíbel prolongación da nosa actividade, visto que a estratexia doutros actores podería pasar por dilatar no tempo a solución para un terreo que permitiría redefinir, nun sentido ou noutro, a vila de Santa Cruz; ...

Os distintos motivos que consideramos para tomar esta decisión en realidade derivan do consello que nos deu Marcos, representante da Asociación pola defensa do Parque Rosalía, tanto nas xornadas de debate do 30 de abril coma nunha conversa posterior mantida en Gutiriz. O caso desa asociación é un exemplo de manual de como un grupo de veciños conseguiu deter unha operación urbanística pragada de irregularidades e que suporía un atentado urbanístico contra a cidade de Lugo. A resultas dese caso hai varios responsábeis políticos imputados por prevaricación, tráfico de influencias, suborno, etc ... 

Como o noso presidente electo indica nesta entrevista, estamos a preparar un novo calendario de actividades para acadar, do xeito máis construtivo e convinte para todas as partes implicadas, que a finca do Maxi pase a ser patrimonio público, para que se integre no parque Luís Seoane e poidamos manter a vila de Santa Cruz de Liáns aberta ao Mar.

domingo, 2 de agosto de 2015

Resposta de Santa Cruz Aberta ao Mar ás reiteradas negativas do alcalde de Oleiros a unha reunión

No último pleno municipal, celebrado onte xoves á tarde, o alcalde de Oleiros reiterou a súa negativa a manter unha reunión con integrantes da nosa plataforma veciñal, tal como solicitáramos o día 18 de Abril deste ano, o mesmo en que entregamos 1.889 sinaturas de apoio á nosa petición. Un mes máis tarde, o 18 de Maio, ao non ter resposta voltamos facer petición por escrito no rexistro do concello. 

Nestes últimos días xa expresara que non nos ía conceder audiencia en varios medios de comunicación. Deixando de lado as formas, que son francamente autoritarias e arrogantes, consideramos que a súa axenda non é tan apretada como para que se negue a manter unha reunión con veciños que simplemente pretendemos presentar de xeito razoado unha petición para a cal puidemos demostrar que hai un apoio popular moi importante. Como xa indicamos, conseguimos presentar perto de 2.000 apoios para solicitar que o Concello de Oleiros adquira, preferentemente de xeito negociado e permutando ese terreo por outro, a parcela do antigo hotel Maxi, evitando o enorme perxuízo paisaxístico e urbanístico que causaría un edificio das dimensións permitidas no estudo de detalle aprobado polo concello. Lembremos que tería 18,5 metros de alto, 4,5 máis que o antigo Maxi, e ocuparía prácticamente todo o ancho da finca, mentres que o edificio anterior ocupaba algo máis da metade.


Dende o noso punto de vista, o discurso público de Ángel García Seoane, que habitualmente exalta a defensa da paisaxe, do patrimonio cultural e do medio ambiente fronte ao urbanismo depredador e á especulación, casa mal con que non só non queira intervir, senón que el mesmo aprobase un grande aumento do volume de edificabilidade da finca.

Outro punto en que semella haber contradicións é en que normalmente gábase de que o seu é un goberno dos veciños, que conta coa sua opinión e defende os seus dereitos e intereses. Neste caso non só non actúa, senón que permítese desprezar unha simple petición para lle trasladar unha proposta. Ao mesmo tempo, non se abstivo de lanzar frases de afecto e amizade cara ao principal socio da empresa Hostcastros, tanto en plenos anteriores como nos actos electorais con comida e bebida que chama ceas frías. Entendermos perfectamente que a súa amizade con este empresario sexa moi estreita, pero o que o alcalde non pode facer é empregar o seu cargo, dende o que está obrigado a representar e defender ao conxunto da veciñanza, para favorecer a un amigo persoal. E dende logo, aprobar un aumento da altura permitida para edificar nunha finca, sen contraprestación, non dá moi boa imaxe.

Como único argumento a favor da súa postura cita o resultado electoral. Felicitámolo sinceramente pola súa maioría absoluta, pero iso non significa que poida pasar a ignorar completamente a opinión dos veciños da vila de Santa Cruz ou de calquera outro lugar do concello. Él mesmo sabe que non ten un mandato popular para permitir desfeitas urbanísticas: demostrouno cando o 1 de Maio, en plena carreira cara as eleccións municipais do 24 dese mes, denegou a licenza de obra ao propietario da finca. Desgraciadamente, semella que foi unha maniobra electoralista, que conseguiu o seu obxectivo ao facer pensar a moita xente coa que falamos, que o obxectivo da plataforma estaba acadado e que íase impedir que Santa Cruz voltase quedar, dun xeito inda máis claro que antes, sen vistas ao mar, ao castelo na illa que é o símbolo do Concello de Oleiros e á cidade da Coruña. 

xoves, 4 de xuño de 2015

Posición da plataforma Santa Cruz Aberta ao Mar sobre a situación actual

Como xa indicamos na entrada do domingo 3 de maio, o concello de Oleiros emitiu un decreto no que rexeita a solicitude de licenza de obra para a construción dun apartahotel na parcela, pero sen admitir expresamente o enorme perxuízo paisaxístico e urbanístico que causaría un edificio das dimensións permitidas no estudo de detalle aprobado polo concello. Lembremos que tería 18,5 metros de alto, 4,5 máis que o antigo Maxi, e ocuparía prácticamente todo o ancho da finca. A equipa de governo da institución municipal aduciu que denegaba o permiso porque o que lles transmitira o propietario era que pretendía construir un hotel de 5 estrelas, e que non admitían que se empregase o terreo para edificar un apartahotel. 

Como se pode consultar nesta noticia de prensa do 28 de febreiro, a empresa propietaria xa confirmara que o que pretendía facer era un apartahotel ou bloque de apartamentos vacacionais. Calquera que coñeza mínimamente Santa Cruz e adicase un pouco de tempo a matinar sobre as declaracións do alcalde, Ángel García Seoane, de que aumentara a edificabilidade para facilitar que se abrise un hotel de 5 estrelas, podía chegar, como fixemos os integrantes da plataforma, á conclusión de que ese proxecto non era viábel. A 215 metros da parcela hai un hotel de 4 estrelas, recentemente reformado, coas mesmas espectaculares vistas e un amplo xardín, o Portocobo. Pois ben, este hotel ten unha ocupación francamente baixa, e a percepción xeral en Santa Cruz é que se mantén grazas ás vodas e eventos, non polas pernoctacións. Outro hotel desas características tería no mellor dos casos que se conformar con parte desa tarta. E nese caso, ao ter menos espazo dispoñíbel, non tería os ingresos extra das vodas e semellantes.


A empresa, Hostcastros S.L., cuxa única actividade ata o de agora fora adquirir a finca, respostou presentando un recurso contencioso administrativo no xulgado. De todos xeitos, a relación co concello de Oleiros non debe ser especialmente mala, posto que como aparece aquí, rematan de ceder gratis o uso da finca como zona ORA. Como xa comentamos o ano pasado, non se pode cobrar por ese servizo nunha finca privada.

A ORA regúlase pola Ordenanza nº 31 do Concello de Oleiros, e no art. 2 estabelece que a taxa aplícase nas vías públicas municipais: “utilización privativa ou o aproveitamento especial do dominio público local”. Esta norma desenvolve o Texto Articulado aprobado por Real Decreto-Lexislativo 339/1990) e do seu Regulamento (aprobado por Real Decreto 1428/2003). En concreto, o art. 93.1: "o réxime de parada e estacionamento en vías urbanas regularase por ordenanza municipal". A parcela do antigo Maxi é unha finca privada, polo que non se lle pode aplicar unha taxa por estacionamento en vía pública.


 
Dende Santa Cruz Aberta ao Mar mantemos que a única solución viábel para impedir unha desfeita urbanística que condicionará o deseño e a calidade de vida dos habitantes da nosa vila é a adquisición polo Concello de Oleiros. Preferimos que se leve a cabo de xeito negociado e sen prexudicar a ninguén, pero consideramos que un edificio nese lugar, especialmente das características do proxectado deixaría a Santa Cruz sen mar. Non existe nengún impedimento: nin legal nin, a xulgar polos 6 millóns de euros de superávit do concello do ano pasado e a posibilidade de realizar unha permuta por outros terreos de propiedade municipal, tampouco económico.

A propiedade pública da parcela permitiría conserver a espectacular vista ao castelo, á costa e á ría dende o núcleo da vila. O desenrolo urbanístico de Santa Cruz debería estar orientado a nos integrar na nosa contorna e a aproveitar o espectacular patrimonio paisaxístico e monumental co que contamos.

domingo, 10 de maio de 2015

Música e poesía aberta ao mar

Despois de ter organizado unha foliada na praza de Esther Pita, tivemos que suspendela porque daban choiva para o día en cuestión, que ía ser o 26 de abril. Para o que resultou útil foi para comprobar o talante democrático do alcalde, Ángel García Seoane, posto que dende o concello de Oleiros denegárasenos o uso dese espazo público e tivemos que solicitar autorización á Subdelegación do Goberno, que a concedeu por silencio administrativo. Non foi a única actuación dese estilo: tamén se nos denegou o uso do auditorio das Torres de Santa Cruz para a xornada de debate, que finalmente fixemos na Facultade de Ciencias da Educación Física, en Bastiagueiro.

Como solución para realizar un acto festivo, optamos por unha sesión de música e poesía nun local hostaleiro de Santa Cruz, o d'Tati. O encontro tivo lugar o sábado 8 de Maio ás 22 horas, e durou ata ben máis aló das doce da noite. A asistencia, moi a ollo, foi de unhas 60 persoas, e que me corrixa alguén se me trabuco. 

Tras unha breve presentación da plataforma, lembrando o seu obxectivo de protexer a conexión de Santa Cruz co mar e evitar un atentado urbanístico, e un par de apuntes sobre o percorrido dende a súa creación, pasouse a escoitar as lecturas de poemas de Teresa Ramiro e Xosé Iglesias, mariscadora e mariñeiro e poeta respectivamente. Persoas cuxas vidas están unidas ao mar e que ademais dos seus oficios respectivos practican o activismo para defender tanto o medio mariño como os dereitos dos que nel traballan.

Despois veu unha impresionante actuación musical de Maghúa, un trío de pandereiteiros espectacular e cun impresionante sentido do humor. O ritmo e a capacidade de contaxiar entusiasmo foron inesquecíbeis, especialmente -supoño- para os que non os coñeciamos.
 
 
 

A seguir,  tivemos as lecturas de Ramiro Vidal Alvarinho, poeta e membro da plataforma Santa Cruz aberta ao mar, con textos da súa obra "Mares de queijo", e do escritor Manuel Miragaia Doldán. Ambos conseguiron algo tan difícil como manter o silencio entre o resto de asistentes a un local de ocio a esas horas da noite. En particular, no caso de Ramiro, hai que dicir que impresiona a metamorfose que opera nel ao declamar. Nótanselle as táboas e consegue impor. Como tamén impuxo o escritor e locutor Xosé Henrique Rivadulla Corcón, ex-membro do batallón literario da Costa da Morte, que completou o elenco de poetas.

Finalmente, chegou o intre de Xurxo Souto e os Tres Trebóns: houbo debate sobre o seu número, e non sei se se acadou un acordo. O caso é que coma músicos de longo percorrido e coa maquinaria en perfecto estado de revisión, e coa axuda de cancións que para algún de nós marcaron unha época -para min en particular é o caso de Gaiteiro-, fixeron que o local de Tati tremese co balbordo e fixo que todos saísemos entusiasmados e con ganas de máis.




Evidentemente habería moito máis que contar, pero por respecto á privacidade das andanzas nocturnas de cada un e para evitar acusacións de inmoralidade, que poderían chegar dende as máis altas instancias de Oleiros, polo de agora abonda con esta breve crónica. En resumidas contas: que todos o pasamos moi ben e que todas as opinións que escoitei, Tati incluída, foron moi boas e mesmo con ganas de repetir algo así.










domingo, 3 de maio de 2015

Debate público no INEF e denegación da licenza de obra para o apartahotel polo Concello

Este xoves 30 foi un día moi movido para a plataforma "Santa Cruz aberta ao mar". Pola nosa banda celebramos un debate aberto ao público no salón de actos do INEF, despois de que o Concello de Oleiros nos denegase o uso das Torres de Santa Cruz.

Do mesmo xeito que agradecemos enormemente a colaboración da Universidade da Coruña, temos que denunciar que dende o Concello, como xa aconteceu coa denegación do uso da praza Esther Pita para unha foliada, que finalmente foi autorizada pola subdelegación do goberno, pero que tivemos que anular por mal tempo, preténdesenos impedir o uso de espazos públicos e locais municipais que son propiedade de todos os cidadáns, non só do alcalde, por intereses políticos, electorais e talvez mesmo persoais.

Pola banda do Concello, á saída do debate chegounos un rumor que posteriormente puidemos comprobar a través da prensa: que o Concello de Oleiros denegara a licenza de obra para a construción do apartahotel, de 18,5 metros de alto e todo o ancho da finca, co que se pretendía separar a Santa Cruz do mar, privando á nosa vila dunha das mellores vistas da comarca. Segundo esas mesmas informacións o propietario da finca tería presentado un recurso contencioso contra a resolución. 

Consideramos que esta denegación a menos dun mes das eleccións locais, é unha primeira vitoria das veciñas e veciños que defendemos a adquisición da parcela polo concello para o seu uso público. Dende a plataforma temos que dicir que supón unha demostración de que se a veciñanza se organiza e actúa, ten a capacidade de mudar as cousas, no que non deixa de ser un exercicio de democracia.

Partindo de que recoñecemos que é un feito importante, temos que dicir que inda non se acadou o obxectivo da plataforma: que o concello, preferentemente de xeito negociado, e a poder ser mediante permuta por outros terreos, adquira a parcela do antigo hotel Maxi, parte da cal é unha concesión pública para a ampliación dunha antiga fábrica de conservas, e que por aparente arte de maxia pasou a se considerar terreo privado para uso hoteleiro.

Dende Santa Cruz aberta ao mar continuaremos coas nosas actuacións, con máis forza que nunca e sendo conscientes de que a maioría dos veciños e visitantes habituais apóiannos. Non estamos dispostos a que un cambio de nome do proxecto, ou algunha negociación opaca leve a que se remate autorizando que unha mole de cemento arruíne as vistas, o urbanismo e o atractivo da nosa vila. O único destino lóxico para esa finca é que se adquira polo Concello e se empregue como praza ou zona verde. Como dixo un dos poñentes na xornada de debate, a conexión co mar e a integración coa paisaxe permitirían repensar Santa Cruz para mellor.

O debate

A moderadora e presentadora foi a nosa compañeira, Isa Torrado, que unha vez máis dá a cara en representación de Santa Cruz aberta ao mar.



Marcos Boulio Corral: asociación na defensa do parque Rosalía de Castro de Lugo. Conseguiron a paralización por orde xudicial da construción de 6 bloques de 9 alturas fronte ao parque e a imputación de varios técnicos municipais. Tamén presentaron contencioso contra o PXOM de Lugo, pendente de sentenza, e colaborou coa asociación A Pena, de Cospeito, denunciando problemas de contaminación en toda a comarca.



O segundo poñente foi Luís Corveiro Maanhóm: "Degradación costeira dende o punto de vista patrimonial". É técnico e director de excavacións, controis e sondaxes arqueolóxicas. Formou parte da equipa de traballo do PXOM do Concello de Carnota, levando o apartado arqueolóxico. Ten participado en publicacións científicas e xornadas arqueolóxicas relacionadas co patrimonio litoral.



 O terceiro foi Pablo Pérez Golpe, cunha intervención titulada "Non é unha parcela calquera: máis ambición e menos presas para o centro de Santa Cruz". É membro de Ergosfera, un grupo de arquitectos adicados á investigación sobre urbanismo e territorio. 



Por último, Xandro García Regueira, biólogo mariño, que traballa na estación de bioloxía mariña da Graña e membro de agrupación ecoloxista ADEGA. "O cambio climático no litoral".



Finalmente, e antes de dar paso ao turno de debate, Marta Iglesias, integrante da plataforma Santa Cruz aberta ao mar, leu o manifesto que redactamos para fechar a quenda de intervencións e dar paso ao debate.

En conxunto, o debate foi unha experiencia moi interesante en que cada poñente, dende a súa perspectiva, destacou a importancia de coidar unha paisaxe e un medio tan excepcional coma o litoral de Santa Cruz. A intervención de Marcos presentounos un exemplo de como a acción cidadá pode frear actuacións urbanísticas prexudiciais; Luís fixo unha revisión das ameazas que afronta a nosa costa; Pablo fíxonos ver que a desaparición dunha barreira como era o Maxi, nun lugar tan estratéxico, é unha oportunidade para repensar Santa Cruz como parte dunha paisaxe a unha escala meirande; e Xandro salientou o valor ecolóxico dunha zona de litoral, parte dunha ría, que xa está ameazada polo cambio climático e outras consecuencias das alteracións que as sociedades humanas provocan no medio natural.

domingo, 19 de abril de 2015

Entrega de sinaturas no concello: 1889!

O día de onte, sábado 18 de abril, ás 10:30, fixemos a entrega das 1889 sinaturas de apoio recollidas no rexistro do Concello de Oleiros. Tras unha primeira experiencia nas festas de Santa Cruz o 13 de decembro, dende o 21 de decembro @s integrantes da plataforma comezamos a nos situar nas proximidades da parcela do Maxi os domingos de 12:30 a 14:00 para informar aos veciños e visitantes da localidade do proxecto de construción do apartahotel, das súas dimensións e impacto, e para solicitar que asinasen o noso manifesto reclamando a adquisición da parcela polo concello.


Con esa adquisición posibilitaríase o seu uso público e evitaríase a formación dunha barreira de 18,5 metros de alto e case todo o ancho da finca, moito meirande que o vello edificio do Maxi, que separaría a nosa vila do mar e nos privaría a todos, residentes e visitantes, das mellores vistas da comarca. Os primeiros días a meirande parte dos paseantes pola zona, tanto veciños como visitantes, amosáronse sorprendidos ao escoitar que se pretendía construír un edificio desas dimensións e que só ficaba pendente a licenza de obra. Crían que fose o que fose o que se ía facer, era un proxecto a longo prazo e non sabían que era inminente, e mesmo había bastante xente que sendo de Santa Cruz e arredores custáballe crer que o Concello, e en particular o alcalde, fose consentir un atentado urbanístico coma ese, que deixaría a Santa Cruz tolleita durante décadas.

En tres ocasións tamén fixemos recollida de sinaturas en Santa Cristina - Perillo, á mesma hora, e o apoio tamén foi moi importante, inda que obviamente, ao non estar no lugar en que se pretende atentar contra a paisaxe, podía resultar menos inmediato visualizar o problema.

Outra vía para recadar apoios foi a nosa solicitude de change.org, que podía ser difundida por Internet. Sendo importante, insistimos máis na recollida en persoa, en papel, porque tamén permitía escoitar as opinións da xente, as súas suxerencias e aportacións, e respostar a dúbidas que podíamos ter pasado por alto.

Ao transcorrer as semanas, comezamos a notar que había xente que nos transmitía que se achegara á parcela a propósito para asinar. A problemática comezara a se facer pública, tanto polo boca-orella como polas aparicións en distintos medios de comunicación.

Ao tempo, tamén comezaba a resultar evidente que a maioría dos veciños e habituais da zona xa asinaran o manifesto, e pasaron a ter máis peso os turistas e visitantes ocasionais, procedentes de calquera lugar do mundo, dende Xapón a Estados Unidos, de Alemaña a Brasil, Senegal ou Italia. E mesmo da Coruña! Moitas persoas procedían de lugares como o norte de Italia, Suíza, Dinamarca ou Bretaña, onde existe unha longa tradición de defensa e posta en valor do patrimonio monumental, paisaxístico e urbanístico, e transmitíronnos a súa case incredulidade ao saber do atentado que se pretende levar a cabo en Santa Cruz, e que neses territorios non sería tolerado.

A valoración que facemos do proceso de recollida e información directa é moi positiva, non só polas sinaturas e o que representan senón polo apoio que a xente nos transmitiu, chegando moit@s a nos agradecer a tarefa que estamos a realizar.



domingo, 12 de abril de 2015

Presentación da taxación oficial da finca, denegación de permiso do concello para un acto en exteriores e última recollida de sinaturas

Este Venres día 10, ás 10:30 da mañá, presentouse nunha rolda de prensa a taxación da finca do Maxi realizada polo Gabinete Técnico Pericial Ibérica, un informe de valoración realizado por un perito xudicial inmobiliario, válida a calquera efecto. O importe calculado para o solar é de 980.341 euros.

 
As páxinas en que se detalla son as que acompañan ao texto. Pódese pulsar para ampliar.

Declaración  

A demolición do edificio do hotel Maxi supón unha oportunidade histórica para que o Concello de Oleiros recupere para uso público un espazo excepcional, pegado á costa e que libre de edificacións permite que dende grande parte de Santa Cruz se desfrute dunhas das mellores vistas da comarca, divisándose o castelo, a ría e a cidade da Coruña.
 
O Castelo de Santa Cruz, un ben declarado de interese cultural e adquirido polo concello, é unha das imaxes máis representativas de Oleiros. Xunto co propio litoral, o Parque Luís Seoane e o porto de Santa Cruz forman un conxunto paisaxístico de grande valor e atractivo turístico. A desaparición do edificio do hotel Maxi eliminou a principal barreira visual entre o centro de Santa Cruz e a costa, permitindo recuperar unha relación entre o pobo e a paisaxe que cambia completamente a percepción dos veciños e de calquera visitante.

O aumento do atractivo do pobo de Santar Cruz é absolutamente innegábel, dificilmente se podería ter realizado un cambio a mellor tan evidente. Mesmo permanecendo en pé por agora o muro da finca e coa parcela asfaltada, as vistas ao mar, ao castelo e á costa convidan a quen está de paso a parar e supoñen a mellor tarxeta de presentación posíbel. O impacto sobre o turismo e a hostelaría dun cambio coma este é difícil de cuantificar a priori, pero é evidente que a mellor.


 Vídeo da presentación

O estudo de detalle aprobado aumenta a altura, permitindo 15m de altura da fachada e 3,5m en baixo cuberta, co cal estariamos perante unha barreira de 18,5m de alto. Tamén autoriza unha anchura en paralelo á costa de case o 100% da parcela. Isto suporía unha separación entre o pobo e o mar moito meirande que a que xa existía co anterior edificio. Sería un xeito de privatizar unha paisaxe, que quedaría para quen pagase a estancia mentres se lle negaría á veciñanza.
 
Consideramos que o noso deber é defender ese patrimonio e reivindicamos o noso dereito a participar no deseño urbanístico da nosa vila e do noso concello. Partindo desa base, reclamamos ao concello de Oleiros que abra negociacións co propietario da parcela para a adquisición desta. A permuta por fincas propiedade do Concello e a compensación con aproveitamentos urbanísticos noutras actuacións non é algo insólito senón un sistema utilizado repetidamente polo Goberno Municipal para adquisición de fincas (Finca tenreiro, indemnización na urbanización de Carballido...). O Concello vai ter aproveitamentos urbanísticos no SUD-11 (campo de golf de Xaz) que pode permutar.
 


A taxación que presentamos evidencia que a adquisición deste terreo é perfectamente posíbel: o importe en que se valora a parcela é de 980.341,00 euros. É unha cifra considerábel, pero mesmo se non se aceptase a permuta, sería asumíbel por un concello que no número 45 da publicación “Vivir en Oleiros” declara que o ano pasado tivo un superávit de 3,5 millóns de euros.

O goberno municipal ten a obriga de defender os dereitos e intereses dos veciños, e consideramos que ten recursos máis que suficientes para, seguindo os procedementos estabelecidos e axustándose á lei, impedir unha agresión deste calibre ao noso patrimonio, á nosa calidade de vida e mesmo ao futuro da nosa vila, cuxo deseño urbanístico, imaxe e integración co medio durante moitas décadas dependerá das actuacións que se realicen agora.



Denegación do permiso para un acto público

Dende o concello, despois de que se nos dixese verbalmente que non habería inconvinte, prohíbesenos facer un acto, concretamente unha foliada reivindicativa que ademais de música incluiría xogos tradicionais, na praza de Esther Pita, próxima á parcela. Como alternativa só presentan a posibilidade de facelo no parque das Torres de Santa Cruz, que está separado do centro da vila e rodeado por un muro. A excusa que dan dende o concello é que a praza, na que se celebran as festas de Santa Cruz, está concorrida e hai nenos. 
 


Resulta evidente que só se pretende impedir que se realice unha xornada reivindicativa nun lugar público con visibilidade, pretendendo que se se realiza sexa nun sitio agachado á vista dos transeúntes, no que consideramos un xesto autoritario e impropio dunha corporación democrática. Como resposta pasamos a presentar a seguinte solicitude á subdelegación do goberno:



Última recollida de sinaturas
 

O domingo 12, de 12:30 a 14:00 fixemos a que en principio foi a última recollida de sinaturas antes da entrega ao concello. Fixemos dous grupos, un en Santa Cruz e outro en Santa Cristina e os resultados e o apoio recibido foron moi importantes.

mércores, 11 de febreiro de 2015

Actuacións dende o concello, novas informacións e actividade da plataforma

Actuacións do concello e informacións en prensa

Dende o último texto os acontecementos fóronse sucedendo de xeito un tanto caótico, así que imos tentar seguir a cronoloxía dende onde a deixamos nese post.

- O 8 de xaneiro (saíu en prensa o día 9), o alcalde de Oleiros, Ángel García Seoane, afirmou en Radio Oleiros que cando delegou competencias para negociar a adquisición da parcela do Maxi no concelleiro do BNG Manuel Sarmiento, en realidade quería que fracasase. Non respostou ás criticas do concelleiro por terlle negado a documentación necesaria para realizar a adquisición seguindo os trámites legais. O alcalde mencionou, sen ter ningunha taxación e dando a impresión de que o estaba a inventar, que o prezo era disparatado. De feito, se a cantidade que indicou fose correcta, superaría o 10% do presuposto anual e tería cometido un presumíbel delito de prevaricación, porque tería delegado como alcalde unha competencia propia do pleno do concello. Tamén defendeu que o edificio, de ate 18,5m de alto e de ancho do total da parcela, non quitaría vistas, e insistiu en que un hotel de 5 estrelas sería moi beneficiosa para o pobo. Segundo esas declaracións, o edificio debería ser completamente transparente, e a intimidade dos hóspedes do hotel veríase un pouco comprometida.

- O alcalde seguiu a defender a importancia e transparencia do hotel de 5 estrelas tanto en Radio Oleiros coma nos distintos programas de emisoras privadas (Ser, COPE) ás que o Concello de Oleiros, como institución pública, paga con diñeiro de todos os cidadáns para que o noso alcalde teña unha sección dende a cal defender ou publicitar as súas actuacións. Supostamente xustifícase como promoción do concello. 

- O 25 de xaneiro publicouse neste enlace e posteriormente neste outro que o proxecto da empresa propietaria da parcela, Hostcastros S.L., é construír un apartahotel con 14 apartamentos e 6 cuartos dobres, pensado para tempadas de ate varios meses. Non sería un 5 estrelas, e nin tan sequera sería un hotel. O posíbel emprego que xera un edificio así é case nulo: só se precisa subcontratar a limpeza para cando uns visitantes deixen libre o seu apartamento. Para iso é para o que se deixaría sen vistas á ría e ao castelo á meirande parte de Santa Cruz, agachando o meirande atractivo turístico do pobo e privando aos veciños dunha das mellores vistas da comarca.

- O 29 de xaneiro celebrouse un pleno do concello en que o grupo de goberno negouse a tramitar unha proposta do BNG para instar a comezar unhas negociacións serias para a adquisición do terreo, e o alcalde pechou o pleno con este sentido discurso:


Dende a plataforma veciñal "Santa Cruz aberta ao mar" consideramos este discurso, xunto con outros semellantes emitidos na radio, absolutamente escandaloso. O alcalde ostenta un cargo nunha institución democrática en representación dos veciños de Oleiros, e debe defender os dereitos e intereses dos cidadáns. Nesta cuestión está a se comportar como se fose o avogado dunha empresa privada, defendendo ate perder a compostura aos propietarios e desbotando por completo actuar para protexer o noso patrimonio cultural e paisaxístico e a nosa calidade de vida.

- Entre o 28 de xaneiro e o 1 de febreiro, La Voz de Galicia realizou unha enquisa online que permitía votar a favor ou en contra do proxecto, os resultados, que se poden ver aquí  son moi claros: un 84,25% dos votos son en contra da construción dun "hotel" nese terreo.
  

Actividade da plataforma

Nestas últimas 5-6 semanas a plataforma realizou cada domingo ás 12:30 unha recollida de sinaturas no centro de Santa Cruz, nas inmediacións da parcela do Maxi. A nosa valoración xeral é moi positiva: a grande maioría das persoas contactadas está a asinar o noso formulario de apoios. Unha parte moi importante transmítennos o seu estupor polo proxecto do apartahotel, que consideran unha aberración urbanística, e moitos solicitan información sobre a actividade do grupo.

Recollida de sinaturas do domingo 11 de xaneiro



Recollida o domingo 18 de xaneiro


Tamén realizamos unha rolda de contactos con simpatizantes, que levou a que varias persoas máis pasasen a colaborar na plataforma. Agora mesmo estamos a contactar e a nos entrevistar con distintas asociacións ecoloxistas, de defensa do patrimonio e doutros tipos para solicitar asesoramento e apoio. Nesa liña, tamén estamos a nos comunicar e a acordar reunións con representantes de distintos organismos públicos. Este último mes, en resposta á confirmación de que os plans da empresa Hostcastros consisten na construción dun apartahotel, o PP sumouse ao BNG en reclamar a adquisición da parcela para convertela nun espazo público. O PSOE tamén indicou que de non se construír un hotel de 5 estrelas non atopa xustificado ocupar ese terreo. Dos partidos políticos con representación no Concello de Oleiros só o gobernante, Alternativa dos Veciños, semella manter o seu apoio á construción do edificio.

En paralelo a estas actividades, estivemos a recadar información aportada de xeito desinteresado por distintos profesionais: avogados, arquitectos, expertos en patrimonio e outros. En base a esta e ás nosas propias reflexións e debates, estivemos a acordar cales serán os próximos pasos a realizar, dos que iremos informando cando se concreten en formato, data e hora.